Nona

Awalnya katong dua dari batas arus antara pulau seram dan pulau ambon

Nona anyor ka jazirah leihitu

beta anyor ka jazirah huamual

Tampias di kaki ombak, beta deng Nona hilang tinggal nostalgia.

Hari ini beta datang di tampa yang biasa ada katong dua duduk hitung daun cengkeh karing jatuh

Sampe matahari sambunyi

Katong dua lanjut hitung perahu nelayan yang kejar tanoar

lalu ale bisik-bisik par beta

”Se memang muka itang nyong, mar biking beta hati tatikang”.

Tapi sore ini beta sandiri bajalang ambor kalapa bakar

par kas makan katang kanari dan Nona seng tahu di mana.

Waktu itu, satu tegukan awal kopi key yang katong bikin bagitu manis

akhirnya tegukan yang ke sekian kali dapat ampas, pahit mulai datang

Sementara di bageang timur yang jauh di sana

langit deng laut jadi satu.

Katong dua mulai baku janji sagu salempeng patah dua

tapi ego bikin katong seng baku lia

Katong seng sama Martha deng Alfonso yang relah mati tenggelam atas nama setia

Apalagi mau jadi bintang sirius dan vega di angkasa.

Nona

tampa ini begitu sepi

Baleng-baleng bambu taputar tanpa beta toki-toki kuli bia deng Nona manyanyi hena masa waya.

Catatan:

1. Tentang penyair: Risno Ibrahim lahir di Laala, Seram Bagian Barat,Maluku, 5 Oktober 1996. Sedang belajar di jurusan Ekonomi Syariah, Institut Agama Islam Negeri, Ambon.